লক্ষীপুৰ নগৰত খোৱাপানীৰ বাবে হাহাকাৰ : ১৪ বছৰেও সম্পূৰ্ণ হৈ নুঠিল লক্ষীপুৰ নগৰ পানী যোগান আঁচনিৰ কাম: জিলা প্ৰশাসনক তদন্তৰ দাবী:

লক্ষীপুৰ নগৰত খোৱাপানীৰ বাবে হাহাকাৰ : ১৪ বছৰেও সম্পূৰ্ণ  হৈ নুঠিল লক্ষীপুৰ নগৰ পানী যোগান আঁচনিৰ কাম: জিলা প্ৰশাসনক তদন্তৰ দাবী:

গোৱালপাৰা জিলাৰ লক্ষীপুৰ নগৰত বিশুদ্ধ খোৱাপানী আঁচনিৰ নিৰ্মান কাৰ্য  বিগত  ১৩/১৪ বছৰেও ঠিকাদাৰ আৰু বিভাগীয় কৰ্তৃপক্ষই সম্পন্ন নকৰাত  লক্ষীপুৰ বাসীৰ মাজত তীব্ৰ প্ৰতিক্ৰিয়াৰ সৃষ্টি হৈছে। বিশুদ্ধ খোৱাপানীৰ পৰা বঞ্চিত হোৱাৰ বাবেই বিভিন্ন ধৰনৰ পেটৰ বেমাৰত আক্ৰান্ত হৈছে লক্ষীপুৰ বাসী ৰাইজ। জনা মতে প্ৰায় পঞ্চাশ বছৰ পূৰ্বে চৰকাৰে লক্ষীপুৰক নগৰ হিচাপে ঘোষণা কৰে । কেইবছৰমান আগতে চৰকাৰে লক্ষীপুৰক মহকুমা হিচাপে ঘোষণা কৰে।

দহটা ৱাৰ্ড থকা নগৰখনত কুৰি হাজাৰতকৈ অধিক লোক বসবাস কৰে। কিন্তু আজি লৈ লক্ষীপুৰ বাসীয়ে নাপালে এটুপি বিশুদ্ধ খোৱাপানী। লক্ষীপুৰ নগৰৰ ৰাইজে দীৰ্ঘদিন ধৰি বিশুদ্ধ খোৱাপানী যোগান ধৰাৰ বাবে বাৰে বাৰে দাবী জনাই আহিছিল। সেইমৰ্মে  ১৪ বছৰ পূৰ্বে  চৰকাৰে ধুবুৰী পৌৰ নিগমৰ অধিনত পানী যোগান আঁচনিৰ বাহী অংকৰ ধণ আবন্টন দিয়ে। লক্ষীপুৰ গাদলাৰপামত অকল দূটা অৰ্ধ নিৰ্মিত গৃহ নিৰ্মান কৰিয়েই ঠিকাদাৰ আৰু বিভাগীয় কৰ্তৃপক্ষই  সমাপ্ত কৰিলে আঁচনিৰ কাম। তাত বহুওৱা নাই পানী উলিওৱা যন্ত্ৰ-পাতি। নিযুক্তি দিয়া নাই কৰ্মচাৰী।

সম্প্ৰতি ভূত বাংলাত পৰিণত হৈছে টা ভৱন। মূল গৃহ নিৰ্মানৰ প্ৰায় দহ বছৰ পিছত  লক্ষীপুৰ মহাবিদ্যালয়ৰ কাষত চৰকাৰে  বিশুদ্ধ খোৱাপানী যোগান আঁচনিৰটোৰ টেংকি নিৰ্মানৰ বাবে ধণ আবন্টন দিয়ে। ইয়াত এটা টেংকি নিৰ্মাণ কৰিয়েই দায়িত্ব সামৰিলে ঠিকাদাৰ, অভিযন্তা আৰু বিভাগটোৰ উৰ্ধোতন কৰ্তৃপক্ষই। আজি লৈ অৰ্থাত পোন্ধৰ বছৰ পিছতো  টেংকিৰ সৈতে সংলগ্ন নহল পানী বহনকাৰী পাইপ। সম্পূৰ্ণ আঁচনিয়েই বিকল  হৈ থাকিল। যেন ই এক ফুলৰ থোপাহে।

ইয়াত পানী উঠোৱাৰ বাবে মেচিন,অইন সামগ্ৰী আৰু মাটিৰ তলৰ  পাইপ আদিৰ একো ব্যাৱস্থা নকৰিলে। অভিযোগ মতে ঠিকাদাৰ ,অভিযন্তা আৰু বিভাগীয় বিষয়া সকলে সিংহ ভাগ ধণ আত্মসাত কৰাৰ বাবেই এটুপিও বিশুদ্ধ খোৱাপানী পাবলৈ সক্ষম নহল লক্ষীপুৰ বাসী ৰাইজে। পানীৰ হাহাকাৰৰ বাবেই বিভিন্ন বেমাৰত আক্ৰান্ত হব লগা হৈছে ৰাইজ। শীঘ্ৰেই পানী যোগান আঁচনিৰ দূৰ্নীতিৰ তদন্ত কৰি বিহীত ব্যাৱস্থা গ্ৰহণ বাবে চৰকাৰক দাবী জনাইছে লক্ষীপুৰ নগৰ বাসী ৰাইজে।